‏لما التعلب فات | شيماء كامل

‏لما التعلب فات‬

فاكرين لما التعلب فات؟؟

قالوا بقينا 3 ثورات..

فرحوا وغنوا وقالوا حليلة

يا اما نعيمة مبارك مات؟؟

رجعوا يلفوا تانى ف ساقية

ويسِفوا تُراب الوزارات...

جابوا الخونة عبيد الكرسى

واتأخونا بفرض الذات..

راحوا شالوهم قالوا قلبوهم

وبقينا بتوع انقلابات..

جالنا رئيس فى الأصل قيادى

بيطبطب ع الجلابيات..

قال ده انا واقف للارهابى

وهَرَجَع حقك يا رُفات..

واستنينا وسبنا بيوتنا..

واتهَجَرنا بين الأزمات

نَكَشوا تُرابك كله يا سينا..

بيدوروا فيه ع القيادات..

هُما دواعش ولا ّخوارج

ولاّحماس باعته مُساعدات؟؟

ولا مُخطط جاى م الخارج

مش فارقة ان مات فيها ميات

ولاّ الروح عندنا بزيادة؟؟

قُلنا هنعمل تصفيات؟؟

واتلفع بالدمع عنينا

ورجعنا نلف ف حوارات

قُمنا صرخنا وقُلنا يا ريس

عايزين حق مجند مات

أمه بتبكى تقول ده الحيلة

ومالوش تانى أى اخوات

واستنينا كتير اوى ردك..

مسمعناش غير صدى أصوات

فجأة لاقينا التعلب نادى ّّ!!

قُلنا هنبقى 5 ثورات