غلطانه انك تسكتي
أميرة الوصيف
غلطانه انك تسكتي
وتقولي : آه
و لا ترفضي
انك ف مرة تخرجي
بره "الإطار" !
انك تكونى مِسلمة
لعادات ما ترضيش ربنا
ويكون وجودك ف الحياه
من غير قرار !
ندمانه خايفة وتشبهي
حِتة آداه !
وان حَب قلبك يوم بصدق
تقولى : لا
مقدرش أفكك ف القيود
ان شا الله كنت بحب موت
راح أبيع دناوة الحُب
لاجل مُبتغاه
مين الي قال الحب عيب ؟
ده الحب أقوى م الطبيب
لو قلبي يشكى الجرح ليلة
ما يطيبوش الا الحبيب !
وسيبينا بس من الكلام
وفتاوى مين
وقاموس "حرام "
وفلانه حَبت واتنست
وعلاقة فشلت وانتهت
وسنيين غرام
وقوليلي طعم الحب ايه ؟
طب حس قلبك مرة بيه ؟
ولا انتى بس بتهدميه
و بتلعنى الي يبان عليه ؟!
