واحكيلي
هزار طباخ
واحكيلي
***
إحكيلي عن بلدي
إحكيلي كتيرْ
إحكيلي
عن لون الطرقاتْ
نِسْيت لونا .. ولاّ ماتْ .. ؟!!
إحكيلي عن صوت القرميدْ
لمّا تْمطّر
عندو عيدْ ؟!!
وحْكيلي
عن همس الحيطان
وقت الــ يغفى جنبا تنينْ
يحكوا
ويورّد صوتينْ
صوت الأرض وجبّ الدار
إحكيلي
شويةْ
ع الساحاتْ
عن بحّة بركة بالرقصةْ
عن حرقة قلبا والعصّةْ
عن طفل الــ ماداق النومْ
ينطرْ وقت يْزيح البومْ
وبْإيدوا يبكوا اللعباتْ
احكيلي
عن نار الصبّارْ
يوم بيوم
وْتار بْتار
كيف بيغرز سهمو البالْ
وْصوت الآهةْ يْنخّي جْبالْ
احْكيلي
وْمَتْخلّي هالشوق
بِدواير .. يغرقْ ويْسوقْ
دربو يْطوِّل
والموّالْ
إيدو حْبال تجرّ حْبالْ
وغروب يطوّب لغْروب
عَ خْبارْ الـ ضاعت بالحال
ودواير ترسم عالحالْ
درويشا الـ ضيّع موّالْ
حالو يصرخ بالأحوالْ
حلبي
يا شوق القتّالْ
والتغريبة تجنْ ..
تْزنّ
تذلّ ..
تْمنّ
كيف القهر يْجرّ نْهارْ
تسْودّ بْصوتو .. الساعاتْ .. ؟!
احكيلي
احكيلي كتير
وقتي فاضي
والفنجانْ
غَمَّسْ غربةْ ع الحيطانْ
خلّى حْدودا بآخر كونْ
بلدي هْنيك
وْوجعي هون
وْيا مين يْقرّب لبْعيدْ
ويْرجّعني قلب جديدْ
وحْكيلي
حْكيلي ياعيْد
صوتك عم يصحى عالبال ولا ميّت عَ القرميدْ ؟!
احكي
وْمَ تْخلّي الإزميلْ
يتغلغلْ صوتو بْمنديلْ
علّقْ صوتك عالقنديلْ
ضوّي ليلو
خلّي نهارو يْطفّي ويلو
واحكيلوا
عن بلدي الغايبْ
خلّي صوتك شجر الآيبْ
خلّي العين تْعبّي الزعتر
بجروحا
وتقول .. وقتك يا صوت التعتيرْ
إحكيلوا كْتير
صوتي صوتك
صوتي غايب .. جوّا مات بْقلب البير
وْجرحي كْبير
كتير
كتير
