๑۩۞۩๑ معلش ๑۩۞۩๑
هناء نوار
عجبي على قولة : " معلش "
نِجرح بعض .. نقول : معلش
نِخدع بعض .. نقول : معلش
نتحمل قسوة و فُرقة و بُعد
و نرجع برضه نقول : معلش
دنيا غريبة .. و أغرب ما فيها
إنك تموت فيها و ما تعّش
تدارى حزنك جوة نفسك
تدّيها ضهرك .. تِصغر تكِش
تشوفها سودة أو حتى بنى
ما هى واحد و ما تِفرقش
و لما ترجع تحن ليها ..
تلاقى كدب و تلاقى غِش
تِلقى الوشوش عمالة تِضحك
و هى لابسة ميت ألف وش
و ناس ضعيفة واقفة فِ مكانها
و لا بتهش .. و لا بتنش
و ناس المادة عمِت عنيها
تِحرق فِ غيرها و لا تنحرقش
و ناس بتبنى بالزيف قصورها
و ناس بتحلم تسكن فِ عِش
و ناس بتعشق و الخوف ماليها
تِجرح فِ غيرها و ما تنجرحش
ماعادش عندى و لا كلمة أقولها
غير كلمة واحدة : " معلش "
