‏الحُكـــــــــم‬ | شيماء كامل

‏الحُكـــــــــم‬

(مفتتح)

ليه بس يا ام الاهرامات

يا ام المنابع والدول..

ليه بس يا ام الممكنات

بتموتى فيا الامل؟

اشحال مكنتش طيبة

كارماكى ف عيال بالهبل!!

(النص)

ليه غاوية ذُلى وانفعالى

ومركبة وش البرود

ليه بتسرقى ف قوتى وعيالى

ومبعتراهم ع الحدود؟

مليون سؤال راسماه ف خيالى

ومسكتانى بالبارود!

ماتردى ليه يا ام الجحود؟

ماتردى ليه يا ام الحقارة

سايقة ف دلالك وبقذارة؟

ليه سايقة ناسك للدعارة؟

ليه سايبة ف عنيكى العشم؟

بتغازلى بيه يا 100 خسارة

على كل معبد كان علم!!

انا شفت ف عنيكى العجب

ودخلت فيهم 100 هرم

وف قلب دهاليزك رضيت

شيل الهموم ..بيع الأجل..

شايل همومك كالجمل

مسألتكيش يوم الخلاص..

مالكيش ديون عندى خلاص

مالكيش معزة من الأساس

خدتى الحبيب ..خدتى الأمل

خدتى النصيب ..ايه العمل؟

مكتوب لامتى أعيش كده

بتلَطَشى واقول مُحتمل..

لأه اسمحى..

ده انا كيلى فاض

غضبى ف مخاض..

وان طلقى شد هتندمى ..وهتهربى

خليكى مرة على الحياد

ومتخنقيش شوق العباد

خليتى بيتك من ازاز..

بيحدفوا فيه البقر..

سِيِد القرار دستة رعاع...

من أوطى أنواع البشر

حُطى بغرورك فى الحُفر

شوفى كام شهيد لأجلك حضر..

ومتسأليش ايه السبب..

منصوب لظُلمك محكمة

والحُكم شامل بالنفاذ

يا ام الجريمة مُنظمة

ده الحُكم صادر ..وبإيجاز!!