يجوز تعبان
و يبدأ طقس دماغك يفلت حبة جنان
تبربش تانى تطلع فتلة
طبعاً عيل
و أما تصدق تلقى أخوك أو إبنك مثلاً
ماسك "بوزو" بقشر سودانى
تقفش فيه و تقول علشانى
و لو شيكولاتة
تبقى الليلة هزار و أغانى
طبعاً عيل
لما تحب كتابك جداً بالشقلوب
تضحك مع مشهد مكتوب
تسهر ويا الحلم ف صورته
و بتحضن قلبك متلخبط
عاجبك نعكشة الموجة ف شعرك / نبضك
و أما بتمشى وسط الشارع
الهوا لعبى يعاكس روحك
تفرد إيدك و تطير
نص عنيك مقفولة لإنك مشتاق لجناح العصافير
بتفوق على فرملة السكة
و كلمة تصحى الروح زعلانة
يا نسمة بحبك و بخاف منك
قلبك يعشق سرقة نومى
يبعت دقة تفك هدومى
و بعيش يومى زى المشبك
يمسك ف غسيله
تعجبه ألوان مش تفصيله
و يلف ف مولد صحيان
و ف نص السطر
على حرف معدية
قابلت ضى
ماسك المرايات لقلبى
زغللت
شفته جوة الحلم جنبى
و أما قمت لقيته لم الضى عنده
ضحكت منى ضحكت منه
و حدفت ع القمر دمعة
كده تعشق يا قلب العيل الأحلام
تخاف تمشى ما بين الليل
تزق ف ضحكك العتمة
تنور ع الحيطان قنديل
يا حضن خريف
ورق اصفر
بينزل الشجر ع الأرض
تعيش عصافيرك
و تبنى عشها بالعرض
بتعشق خروشة صوته
و تتمناها خيط فستان
و ترجع للأسامى ف صيف
تقول يمكن ده شغل جنان
.....
إيناس البنا
